Bandi ak Zam pran kontwòl ansyen sant Téléco Kenscoff la.

Ansyen sant estratejik Téléco ki nan komin Kenscoff, tonbe nan men gwoup gang k ap opere anba non « Viv ansanm ». Daprè temwayaj sou plas, yo te antre san gwo rezistans, yon sitiyasyon ki lakoz panik nan mitan popilasyon an. Majistra Massillon Jean di li te mande plizyè fwa pou otorite santral yo entèvni pou mete sekirite sou sit la, men apèl sa yo rete san repons.

Okenn reyaksyon vizib nan men fòs lòd yo poko fèt, sa ki relanse gwo deba sou feblès Leta ayisyen  k ap grandi pouvwa gwoup kriminèl yo, menm nan zòn ki te konn pi kalm tankou Kenscoff. Nan yon videyo ki vin viral sou rezo sosyal yo, bandi yo menase detwi enstalasyon an si, avan vandredi, yo pa resevwa okenn apèl nan men otorite yo.

Okipasyon sa a soulve gwo kòlè nan kominote a. « Sit sa a pa sèlman yon enfrastrikti telekominikasyon, li se kè konektivite nasyonal la », esplike Daniel Ogé, yon rezidan Kenscoff ki choke.

Yon lòt sitwayen fristre ajoute : « Nou te avèti otorite yo, yo pa t fè anyen. Kounye a, se nou ki peye konsekans yo. » Plizyè vwa nan opinyon piblik la ap mande kont nan men responsab yo, pandan yo denonse yon feblès Leta ki parèt tankou yon echèk wont nan pwoteksyon espas estratejik peyi a.

#esansyèl

#aktyalite

#konektem

#toutkotenenpotkilè