Rimè sou nouvo mayo Seleção a.

Konfederasyon Foutbòl Brezilyen an (CBF) mete fen nan tout espekilasyon ki t ap sikile sou rezo yo depi kèk jou, sou sa yo te rele nouvo mayo ofisyèl ekip nasyonal Brezil la, pou Mondyal 2026 la. Nan yon nòt piblik, CBF fè konnen klèman: imaj ki parèt sou entènèt la pa gen anyen pou wè ak veritab mayo seleksyon an.

Daprè CBF, ni li menm ni Nike,  patnè ofisyèl ekip la, poko prezante okenn detay sou nouvo seri mayo a. "Nouvo koleksyon an poko deside, epi li pral fèt an kolaborasyon sere ak Nike," dapre deklarasyon ofisyèl CBF lan. Enstitisyon an mete aksan sou angajman li pou respekte règ li yo ak pwosesis patenarya li genyen yo.

Reyaksyon sa a vini nan yon kontèks kote anpil fanatik te deja ap fè analiz sou koulè, estil ak mesaj mayo sa, san yo pa t gen konfimasyon ofisyèl. Yon sitiyasyon ki soulinye enpòtans kominikasyon klè ak ofisyèl sou rezo yo, espesyalman nan epòk kote enfòmasyon ka ale vit epi kreye konfizyon.