🎶 Palmarès Mizik/Videyo Evanjelik – Out 2025.
- Konektem Tv
- 1 sept. 2025
- 3 min de lecture
Mwa Out 2025 lan make pa plizyè pwojè mizikal ki vin anrichi sèn evanjelik la. Plizyè atis lage nouvo mizik/videyo ki atire atansyon piblik la, e ki deja kòmanse gaye sou rezo sosyal ak platfòm mizik yo.
Redaksyon an seleksyone mizik/videyo ki make sèn nan pandan mwa a, avèk detay sou mesaj mizik yo, ak dat yo sòti.
1. Vanessa Bernard – “Yo Pa Anyen Devan’w”
🗓️Sòti: 8 out 2025
Marie Vanessa Bernard louvri mwa a avèk yon mizik adorasyon ki pote yon gwo verite espirityèl: okenn sitiyasyon pa ka kanpe devan pouvwa Bondye.
2. Lovens Markenley Jean – “Jezi Ou Se”
🗓️Sòti: 8 out 2025
Nan nouvo videyo li a, Lovens Markenley Jean pote yon temwayaj pèsonèl sou lafwa li nan Jezi. Mizik la raple kominote a ke malgre difikilte, solitid oswa eksperyans lavi imigran yo, Jezi rete sous espwa ak direksyon.
3. Gérald Cius feat. Kattiana Richelin – “Mwen Kanpe”
🗓️Sòti: 10 out 2025
“Mwen Kanpe” pote yon mesaj kouraj: malgre tantasyon ak difikilte, se sou Jezi sèl moun ka rete djanm. Kolaborasyon Gérald Cius ak Kattiana Richelin pote yon balans ant vokal ak adorasyon.
4. Bethel Worship – “Mirak Mwen”
🗓️Sòti: 13 out 2025
Avèk “Mirak Mwen”, gwoup Bethel Worship mete aksan sou pouvwa Bondye pou transfòme lavi. Mizik adorasyon sa a montre ke Bondye toujou prezan epi ka fè mirak nan nenpòt sitiyasyon.
5. Sherline Dalberis feat. Garby Mesidor – “Sezon Sa”
🗓️Sòti: 15 out 2025
Sherline Dalberis, rekonèt pou vwa li nan Ou Pa Gen Rival, ansanm ak Garby Mesidor, pote yon mizik ki rakonte reyalite lavi: gen sezon ki chaje ak difikilte, men Bondye toujou prezan epi li prepare rekòt ak lajwa.
6. Chrislova Jean – “Premye Pa”
🗓️Sòti: 15 out 2025
Chrislova Jean pote yon mizik ki envite chak moun reflechi sou misyon yo nan lavi. “Premye Pa” raple nou ke chak moun gen yon rezon pou egziste, e menm si defi parèt, destinasyon ou ka chanje si ou fè premye pa a.
7. Louisette Fédé feat. Peterson Jules – “M’Pote Kè’m Ba’w”
🗓️Sòti: 19 out 2025
“M’Pote Kè’m Ba’w” se yon nouvo mizik evanjelik kote Louisette Fede ak Peterson Jules mete aksan sou remèt lavi ak kè nou nan men Bondye. Mizik sa vinn kòm yon zouti espirityèl pou tout moun k ap chèche fòs ak lapè, pandan yo kenbe lafwa yo solid devan defi lavi yo.
8. Bethanie Lafontant feat. Romy Laguerre – “Yaweh”
🗓️Sòti: 23 out 2025
Yon adaptasyon adorasyon ki pote anpil santiman ak espirityalite.
Bethanie Lafontant ansanm ak Romy Laguerre ofri yon pèfòmans ki tounen yon zouti pou ranfòse lafwa chak moun k ap chante.
9. Suzie Guerilus Edmond – “Anba Gras Li”
🗓️23 août 2025
Mizik sa a montre ke sèl kote pou jwenn sekirite, lapè ak lajwa se anba gras Bondye. Suzie Guerilus Edmond pataje mesaj sa a klèman, ki fòme yon referans pou lafwa.
10. Jude Samuel Merat feat. Salomon Lira – “Lè M Kriye Non Sa”
🗓️Sòti: 23 août 2025
Nan “Lè M Kriye Non Sa”, Jude Samuel Merat ak Salomon Lira mete devan fòs ak otorite ki genyen nan non Jezi. Chante a prezante non sa kòm kle viktwa ak delivrans, pandan li montre kijan konfyans nan Bondye bay kapasite pou simonte difikilte lavi.
11. Achille-W feat. Joyclerf Derisier & Peterson Jules – “Se Ou m Genyen”
🗓️Sòti: 29 out 2025
“Se Ou m Genyen” pote yon mesaj fò sou konfyans nan Bondye kòm sipò nan tout batay. Mizik la entegre plizyè vwa ki konplete youn lòt: Achille-W raple ke Jezi se fòs ak pwoteksyon, Joy clerf Derisier montre kijan lafwa ka pote sekirite devan mechan yo, pandan Peterson Jules fè konnen ke sèlman Bondye ki ka fè viktwa posib.
12. Dassise Darilas – “Mwen deja wè viktwa mwen”
🗓️ Sòti: 31 out 2025
Mizik sa a pote yon mesaj klè sou konviksyon ak viktwa pèsonèl. Dassise Darilas montre ke avèk lafwa nan Bondye, tout defi ka simonte, e viktwa deja garanti pou moun ki kwè.
13. Vanunca C. Paulcin feat. Bethsaida J. Lexis – “Etann Limit”
🗓️Sòti: 31 out 2025
“Etann Limit” se yon deklarasyon lafwa kote Vanunca C. Paulcin ak Bethsaida J. Lexis mete aksan sou pouvwa Bondye pou ouvri pòt, kraze baryè, epi leve lavi moun pi lwen pase sa yo te imajine. Chante a prezante Bondye kòm sèl sous kapasite pou depase limit imen yo.
👉🏻https://youtu.be/VxQ2VG5hraE?si=bk7mOCAWt7t499OY
Palmarès Out 2025 la montre ankò richès ak divèsite mizik evanjelik la. Chak atis pote yon pèspektiv diferan, men mesaj yo rete menm: Bondye se sous fòs, espwa, ak mirak.
Nou ankouraje w gade videyo yo, pataje yo ak lòt moun, epi soutni atis sa yo pou mesaj espwa a kontinye rive pi lwen.
Redaksyon:
Vanauscheca Bouzy
Konsepsyon Grafik:
Jo-Flung Bouzy & Abdullah Mode
Commentaires