Nouvo pòtpawòl Lamezon Blanch lan deklare tout migran san papye yo se “kriminèl”.

Nan premye konferans pou laprès li, madi 28 janvye 2025, nouvo pòtpawòl Lamezon Blanch lan, Karoline Leavitt, lanse yon deklarasyon ki soulve gwo polemik. Li deklare tout etranje ki antre ilegalman Ozetazini se “kriminèl”, paske yo vyole lwa imigrasyon peyi a.

Lè yon jounalis te mande li si tout migran ki arete yo gen dosye jidisyè, li reponn san ezitasyon: « Paske yo vyole lwa nasyon an, yo se kriminèl pou administrasyon sa a. Dèske yo antre ilegalman… Wi! Yo se kriminèl. »

Deklarasyon sa a mete aksan sou yon politik migrasyon ki sanble pi sevè pase sa ki te an plas anvan. Pozisyon Leavitt lan ale nan menm sans ak prensip “zewo tolerans”, kote tout antre ilegal sou teritwa ameriken konsidere kòm yon zak kriminèl, san okenn distenksyon.

Deklarasyon sa a ka jwenn sipò moun ki vle yon politik imigrasyon pi di, men li ka souke lòt moun ki wè sa kòm fòm maltretans pou migran yo.

Daprè kritik yo, politik sa a ka mennen nan vyolasyon dwa moun epi mete plis presyon sou kominote imigran yo.

Rete pou nou wè si deklarasyon sa yo pral tradui an mezi konkrè oswa si se yon fason pou administrasyon Trump lan mete plis klète sou direksyon politik li depi nan kòmansman manda li.