Minis Afè Etranjè Peyi Ayiti Lanse Apèl Sipò Entènasyonal pou Ayiti.

Nan yon diskou ki te fèt pandan 220e sesyon Konsèy Egzekitif UNESCO a, Dominique Dupuy, minis afè etranjè Ayiti, lanse yon apèl ijan pou kominote entènasyonal la reponn kriz imanitè ak sekirite peyi a ap fè fas la.

Minis la te soulinye prèske mwatye popilasyon an ap soufri anba ensekirite alimantè ki ap ogmante, pandan y ap fè fas ak yon ogmantasyon nan vyolans gang. “Lekòl fèmen, paske yo tounen refij pou anpil moun, sa ki fè anpil timoun pa ka ale lekòl” .

Li te tou pale sou depòtasyon masif Ayisyen yo ki soti nan Repiblik Dominikèn, sa ki ogmante vilnerabilite moun ki deja afekte anba kriz sila a.

Li fè yon apèl pou mobilizasyon ijans nan kominote entènasyonal, pou bay asistans imanitè epi chèche solisyon dirab pou sekirite ak devlopman nan peyi a. « Li lè pou nou aji, non sèlman pou reponn bezwen alimantè yo, men tou pou retabli lapè ak diyite moun an Ayiti, ».

Dominique Dupuy te pale espesyalman sou kijan fanm ak tifi yo ap soufri anba vyolans gang yo. Li te pataje kèk istwa ki montre ki jan sitiyasyon an difisil pou moun k ap viv la, sitou timoun k ap rantre nan gang.

Nan fen diskou li a, li te mande pou tout peyi yo ede Ayiti. Li te fè konnen ke silans sou sa k ap pase nan peyi a se pa yon solisyon. Apèl li a ankouraje tout moun pou yo mete men ansanm pou ede Ayiti jwenn estabilite ak rekonstriksyon.