Michelle Obama ak Stephen Curry lanse yon nouvo bwason espòtif ki rele "Plezi".

Ansyen Premye Dam Etazini an, Michelle Obama, mete tèt ansanm ak zetwal NBA a, Stephen Curry, pou lanse yon nouvo bwason espòtif ki rele « Plezi ». Bwason sila lanse nan Objektif pou ofri yon pwodui ki gen bon kalite, ki bon pou lasante kontrèman ak anpil lòt bwason ki chaje ak sik yo, pandan l ap kenbe yon gou rafrechi ak bon jan idratasyon, daprè People.com.

Bwason an disponib nan twa (3) savè : Tropical Punch, Orange Mango Twist ak Lemon Lime. Chak boutèy 500 ml gen 12 g sik, 120 mg sodyòm, 500 mg potasyòm ak 90 mg vitamin C.

Konpare ak anpil lòt bwason enèjetik, Plezi gen mwens sik ak mwens sèl, men li rich an potasyòm ak vitamin C, sa ki fè li yon opsyon pi balanse pou sante.

Pou kounye a, bwason an disponib sou Amazon ak nan plizyè makèt Kalifòni tankou Walmart, Albertsons ak Safeway, ak yon pri 2,29 $ pou chak boutèy. Konpayi ki fabrike bwason sa a, Plezi Nutrition, se yon Public Benefit Company Michelle Obama ko-fonde. Misyon l se ede konsomatè yo viv pi an sante atravè pwodwi ki pi ekilibre.