Mark Carney pran tèt Pati Liberal Kanada a nan yon konjonkti difisil.

Pati Liberal Kanada a fè fas ak yon nouvo epòk, apre eleksyon Mark Carney kòm lidè li. Ansyen gouvènè Bank Kanada ak Bank Angletè, ekonomis sila a ranplase Justin Trudeau, ki te kite pouvwa a nan mwa janvye apre prèske dis (10) lane kòm premye minis.

Malgre li pa gen eksperyans politik, Carney, ki gen 59 lane, te ranpòte eleksyon entèn pati a kont Chrystia Freeland, ansyen minis finans lan. Popilarite li chita sou konpetans li nan domèn ekonomi, sitou pou bon jesyon li pandan kriz finansye 2008-2012 la. Kandida a te mete aksan sou rediksyon taks pou klas mwayèn nan, kriz lojman  ak batay kont enflasyon an, pandan l ap eseye mete distans li ak administrasyon Trudeau a, ki pèdi sipò popilè.

Kounye a kòm lidè Pati Liberal la, Carney gen yon defi estratejik devan l: sedui elektè kanadyen yo pou eleksyon jeneral k ap fèt an oktòb. Siksè li ap depann sou kapasite l pou  enpoze tèt li sou sèn politik la.