Konpayi Jet Blue jwenn 2 kò san vi anba yon avyon pandan enspeksyon aprè aterisaj.

Nan entèval 11 zè 30 konsa, nan lannuit lendi 6 janvye 2025 lan, yon teknisyen nan mentnans avyon an dekouvri pandan enspeksyon de (2) kò san vi nan «Train d'atterrissage» avyon an. Airbus A320 sila te soti nan peyi Jamayik, epi pran direksyon New York pou fè eskal avan l t al ateri Fort Lauderdale.

Jiska kounya, otorite yo poko rive idantifye   ni non, ni sèks viktim yo. An menm tan, rezon lanmò yo toujou rete yon mistè ki t a dwe devwale aprè rezilta Medsen lejis yo.

Konpayi Jet Blue bò kote pa l poko ka retrase ki jan de (2) moun sa yo ta fè pou gen aksè ak avyon an. Men konpayi a eksplike gen posibilite pou yo t a anbake depi peyi Jamayik oubyen New York pandan yo t ap fè eskal la.