Gang ki soti Kanaran pran kontwòl yon estasyon radyo nan Mibalè.

Nan dimanch 20 avril, gang kanaran ki sou kontwòl Jeff « Gwo Lwa » mete men sou estasyon radyo Panic FM (97.5) ki chita nan vil Mibalè. Dapre enfòmasyon jounalis lokal Paul Lucknerson konfime, bandi yo rebatize radyo a « Taliban FM » epi yo kòmanse itilize li pou simaye mesaj chèf gang lan ansanm ak mizik pa yo.

Nouvo radyo sa a vize atire odyans ki nan zòn Sant ak Grand Nò peyi a, e li tounen yon zouti pwopagann pou gang sila yo. Sitiyasyon sa a soulve anpil enkyetid sou libète laprès ak sekirite kominotè nan rejyon an.